Situata te Lushnja paraqitet e vështirë, pasi ekipi dhe stafi nuk janë paguar prej tre muajsh. Bëhet e ditur se vonesat përfshijnë edhe trajnerët e Akademisë.
Sipas “Superliga Fan Club”, futbollistët e huaj përballen me probleme shtesë, pasi nuk po marrin mbështetje për pagesën e qirave dhe disa prej tyre janë kërcënuar se do të nxiren jashtë.
Gjithashtu, vaktet e ushqimit janë reduktuar nga dy në një, çka ka krijuar më shumë pakënaqësi brenda grupit.
Premtimet e Bashkisë për zgjidhjen e situatës nuk janë realizuar deri më tani. Për ndeshjen në transfertë ndaj Luftëtarit, ekipi nuk do të grumbullohet një ditë përpara, por do të udhëtojë ditën e ndeshjes.
Udhëtimi prej rreth tre orësh pritet të kryhet para se skuadra të zbresë në fushë. Kjo situatë konsiderohet e pazakontë për një klub që militon në Kategorinë e Parë.
Lojtarët dhe stafi shprehen të shqetësuar për mungesën e stabilitetit financiar dhe organizativ. Në këtë moment, një nga mundësitë për të zbutur gjendjen mbetet përfshirja e sulmuesit të Kombëtares, Rey Manaj, i cili mund të kontribuojë si donator në muajin janar. Klubi shpreson që ky hap të sjellë një zgjidhje të përkohshme në pritje të rregullimit të buxhetit institucional.
