Klubi i Bylisit i surprizoi të gjithë këtë të hënë, kur njoftoi zyrtarizimin e Mirel Josës në drejtimin e skuadrës.
Skuadra ballshiote kishte nisur përgatitjet prej disa ditësh, nën drejtimin e trajnerit Gentian Mezani. Ky i fundit ishte deçiziv në sezonin e fundit, kur arriti të shpëtonte skuadrën nga rënia në Kategorinë e Parë.
Arsyeja e largimit të Mezanit është familjare. Bylis ka njoftuar se Mezani duhej të udhëtonte drejt Italisë, për shkak të impenjimeve familjare.
Njoftimi i klubit:
FK Bylis ka kënaqësinë të njoftojë uljen e trajnerit të mirënjohur, Mirel Josa në stol.
Skuadra jonë i beson drejtimin trajnerit me më shumë trofe në historinë e futbollit shqiptar, të mirënjohurit Mirel Josa.
62-vjeçari do të pasojë në këtë detyrë Gentian Mezanin, i cili pati një rol deçiziv në mbijetesën e Bylisit në sezonin e shkuar, duke shmangur edhe “Play-out”, por që për shkak të impenjimeve familjare gjatë kësaj periudhe do të largohet në shtetin fqinj Itali edhe me konsensusin e presidentit Besnik Kapllanaj, nisur edhe nga miqësia mes dy palëve.
Për Mirel Josën, Bylisi regjistron kapitullin e 21-të në karrierën e tij, me më shumë se dy dekada, ku ka fiksuar rezultate shumë të mira që kulmojnë me rekordin e trofeve të fituar, plot 12, 5 tituj kampion, 4 Kupa dhe 3 Superkupa. Të mërkurën, trajneri i ri do të prezantohet para skuadrës dhe do të nisë menjëherë nga puna. I urojmë mirëseardhjen trajnerit të ri Mirel Josa, njëkohësisht e falënderojmë edhe Gentian Mezanin, për punën e mirë që ka bërë në skuadrën tonë!
