Besëlidhja po vijon afrimet me synimin për t’u rikthyer në Kategorinë e Parë pas disa sezonesh mungesë. Klubi lezhjan ka arritur marrëveshjen me mesfushorin e njohur, Ardit Hila.
Futbollisti është i lirë pas mbylljes së aventurës me Elbasanin në muajin korrik. Hila sjell eksperiencë të gjatë në futbollin shqiptar, pasi ka veshur fanellat e disa skuadrave të Superiores si Tirana, Elbasani, Teuta, Kukësi dhe Partizani. Me këto të fundit ai ka arritur të shpallet edhe kampion.
Përveçse në Shqipëri, Hila ka luajtur edhe në Kosovë me Prishtinën, Gjilanin dhe Prishtinën e Re.
Ky afrimi i shtohet përforcimeve të tjera të Besëlidhjes, që synojnë objektivin e ngjitjes një kategori më lart.
