Te Tirana po ndërmerren ndryshime të thella në skuadër pas rezultateve të dobëta të javëve të fundit. Klubi ka nisur procesin e largimeve për të krijuar hapësira në merkaton e janarit.
Megjithatë, disa lojtarë janë ende nën kontratë, gjë që sjell rrezik për çështje ligjore nëse procesi nuk menaxhohet siç duhet. Për këtë arsye, vendimet më të ashpra kanë prekur futbollistët e rinj.
Portieri Leon Kozi është shpallur i padëshiruar dhe është larguar nga ekipi pa një argument të qartë publik. Po ashtu janë ndarë nga skuadra edhe mesfushori Hajrulla Tola dhe mbrojtësi Ziad Ouled, së bashku me disa emra të tjerë.
Sipas “Superliga”, futbollistëve të larguar u është bllokuar edhe hyrja në restorantin e klubit. Në të njëjtën kohë, disa lojtarë të tjerë, si Patsatsia dhe Mensah, po përballen me presion për t’u larguar. Situata vijon të jetë e ndërlikuar për shkak të kontratave të vlefshme të futbollistëve.
Klubi ende nuk ka dhënë sqarime zyrtare për kriteret e përdorura në këto vendime. Lëvizjet e fundit pritet të ndikojnë në përbërjen e ekipit deri në hapjen e merkatos së janarit.
Veprime në kufijtë e amatorizmit, të cilat vështirë se shihen në klube të tjera profesioniste. Më i turpshëm është fakti se këto ndodhin në ekipin më të titulluar të vendit.
