Këtë të premte, 6 janar, u zhvilluan punimet e Asamblesë së Përgjithshme Zgjedhore të Shoqatës Rajonale të Futbollit Tiranë.
Në mbledhje morën pjesë 45 anëtarë dhe 77 delegatë, të cilët diskutuan mbi pikat e rendit të ditës. Krenar Alimehmeti është rizgjedhur në pozicionin e kryetarit të kësaj shoqate për një mandat të ri katërvjeçar.
Gjatë asamblesë u përcaktuan gjithashtu delegatët që do të përfaqësojnë shoqatën në Asamblenë e Përgjithshme të FSHF-së.
Në rendin e ditës ishin edhe propozimet për kandidatë për President të FSHF-së dhe për anëtarë të Komitetit Ekzekutiv. Anëtarët e shoqatës kanë propozuar si kandidat z. Armand Duka për postin e Presidentit të FSHF-së, që u votua nga të gjithë anëtarët e shoqatës gjatë punimeve të asamblesë.
Ndërsa, si kandidat për anëtar të Komitetit Ekzekutiv të Federatës Shqiptare të Futbollit, anëtarët e SHRF Tiranë votuan për z. Lutfi Nuriu.
