Armando Broja dhe Anis Mehmeti mund të luajnë titullarë në miqësoren me Ukrainën që do të zhvillohet mbrëmjen e kësaj të marte në Valencia. Dy lojtarët, të cilët aktivizohen në Angli, duket se do të jenë lëvizja e Silvinjos në repartin ofensiv.
Broja hyri në fushë si zëvendësues në takimin me Poloninë, ndërsa Mehmeti qëndroi në stol. Mehmeti pritet të luajë në të majtë të sulmit, ndërsa Broja në qendër.
Në krahun e djathtë, mund të luajë sërish Myrto Uzuni, siç bëri ndaj Polonisë.
Mungesat në sulm janë të rëndësishme, pasi të dielën u konfirmua dëmtimi i Ernest Muçit. Sulmuesi i krahut ka një lëndim në kofshën e djathtë që u vërtetua pas rezonancës magnetike. Muçi u largua nga grumbullimi, pasi i duhen disa ditë pushim dhe do ta vijojë riaftësimin tek ekipi i tij, Trabzonspor.
Në portë do të jetë sërish Strakosha, ndërsa në të majtë të mbrojtjes pritet Stavro Pilo.
Në qendër të mbrojtjes do të luajë Gjimshiti, ndërsa në krahun e tij mund të jenë Cake ose Pllana.
Në të djathtë të mbrojtjes do të luajë Balliu, në vendin e Elseid Hysajt.
Nuk priten shumë ndryshime në mesfushë, ku pritet të luajnë Asllani, Shehu dhe Laçi.
Ndeshja miqësore, Ukrainë-Shqipëri do të luhet mbrëmjen e kësaj të marte, duke nisur nga ora 20:45, në Valencia.
