Situata e trajnerëve në prag të miqësores Shqipëri-Ukrainë paraqet dy qasje të ndryshme sa i përket të ardhmes në krye të pankinave respektive.
Sergei Rebrov dhe Silvinjo ndodhen në muajt e fundit të kontratave të tyre, të cilat përfundojnë zyrtarisht me mbylljen e këtij edicioni të Botërorit.
Ndryshe nga tekniku brazilian i kuqezinjve, i cili ka zgjedhur të presë korrikun për të diskutuar rinovimin, Rebrov ka shprehur gatishmërinë për të firmosur menjëherë.
Pavarësisht eliminimit të Ukrainës nga faza “play-off”, trajneri aktual u ka bërë të ditur drejtuesve se dëshiron të vazhdojë projektin edhe për një tjetër edicion.
Tashmë vendimi përfundimtar i takon presidentit të Federatës Ukrainase, Andriy Shevchenko, i cili duhet të vlerësojë ecurinë e ekipit. Ky zhvillim vjen në një moment delikat, ku të dyja kombëtaret po kërkojnë të rigjejnë stabilitetin pas dështimit për kualifikim.
Mbetet për t’u parë nëse Shevchenko do t’i besojë sërish Rebrovit apo do të kërkojë një emër të ri për stolin.
