Opsioni i transferimit të Kevin Dodajt te Partizani konsiderohet i pamundur për shkak të rregullores së FIFA-s.
Sipas kësaj rregulloreje, një lojtar mund të regjistrohet në tre klube gjatë një sezoni, por të aktivizohet vetëm në dy prej tyre. Dodaj ka luajtur ndeshje zyrtare me Vllazninë në Europë dhe më pas është aktivizuar me CSKA-në.
Për këtë arsye, një huazim te Partizani nuk do t’i lejonte atij të luante. Ndryshe paraqitet situata për një rikthim të mundshëm te Vllaznia, ku mund të aktivizohet pa kufizime. Këto llogari vlejnë vetëm në rast huazimi.
Nëse Dodaj do të shitej përfundimisht, ai mund të luante në çdo klub, por kostoja e transferimit është e lartë për tregun shqiptar. Në Bullgari raportohet se sulmuesi nuk është përshtatur plotësisht te CSKA. Në kampionat ai është aktivizuar në tetë ndeshje, prej të cilave vetëm dy si titullar.
Vllaznia aktualisht është e bllokuar në merkato për shkak të çështjeve në FIFA. Partizani ndërkohë po kërkon përforcime në krahët e sulmit, por po shqyrton alternativa të tjera.
