Klubi i Elbasanit ka depozituar pranë Federatës Shqiptare të Futbollit një kërkesë zyrtare për shqyrtim disiplinor ndaj Tiranës, duke kërkuar që ndeshja mes dy skuadrave të shpallet në tavolinë me rezultatin 3-0 në favor të verdhebluve.
Elbasani mbështetet konkretisht në nenin 37 të Rregullores së Veprimtarisë Futbollistike, i cili parashikon se në rast refuzimi për të luajtur, mosparaqitjeje ose përgjegjësie për moszhvillimin e një ndeshjeje plotësisht apo pjesërisht, Komisioni i Disiplinës dhe Etikës shpall ndeshjen të humbur në tavolinë për klubin përgjegjës.
Po ashtu, rregullorja përcakton se nëse një veprim i tillë përsëritet në më shumë se një ndeshje gjatë sezonit, klubi mund të përjashtohet nga gara dhe të zbresë një kategori më poshtë.
Në këtë kontekst, Elbasani rikujton se Tirana ka pasur episode të ngjashme edhe më herët gjatë këtij sezoni.
