Sulmuesi i Partizanit, Arshonzh Bintsuka, do t’i bashkohet skuadrës së Flamurtarit për pjesën e mbetur të sezonit.
Marrëveshja mes klubeve është arritur në formë huazimi, pasi 23-vjeçari nuk po gjente hapësira të mjaftueshme në qendër të sulmit te të kuqtë.
Bintsuka ka një kontratë me Partizanin deri në vitin 2027, çka ka bërë që klubi kryeqytetas të mos e shesë përfundimisht, me shpresën e një përfitimi financiar në të ardhmen.
Gjatë këtij sezoni, kongolezi është aktivizuar në 14 ndeshje midis kampionatit dhe Kupës, por pa arritur të shënojë asnjë gol. Konkurrenca e shtuar në repartin ofensiv me lojtarë si Toma, Skuka dhe Kontreras, ndikoi në vendimin për këtë lëvizje.
Te Flamurtari, sulmuesi pritet të ketë më shumë minuta në dispozicion për të rigjetur formën e tij. Klubi vlonjat përfiton kështu një element me eksperiencë nga Superiorja për të përforcuar objektivat e tij sezonalë.
