Trajneri i Kombëtares, Silvinjo, doli sot para mediave për të folur mbi listën e publikuar për ndeshjet e shtatorit, duke zbuluar se mesfushori i Dinamos, Klevi Qefalija, ishte pjesë e listës së pritjes. Për shkak të një dëmtimi, mesfushori nuk u grumbullua, pasi stafi nuk dëshironte të rrezikonte gjendjen e tij fizike. Tekniku kuqezi foli gjithashtu për rëndësinë e miqësores, si një mundësi për të testuar lojtarë të rinj dhe për të parë alternativa të ndryshme.
“Kur duhet të zhvillojmë një ndeshje miqësore para asaj zyrtare, është më pak e vështirë, për aspektin e menaxhimit. FSHF ka punuar shumë për të zhvilluar grumbullimin dhe miqësoren.
Miqësoret të japin mundësi të shikosh lojtarët që nuk kanë pasur mundësi në Kombëtare. Jam i bindur që do jetë ndeshje e mirë për tu testuar.
Është momenti jo më i mirë për lojtarët. Shumica e lojtarëve janë të mësuar. Nuk jam i shqetësuar. Është çështje minutazhi.
Qefalija është një lojtar që ka bërë ndeshje të mira me Dinamon. Është një lojtar teknik, luan me këmbën e majtë. Ka një dalje të bukur me topin. Nuk është lojtar fizik. Ishte në listën e pritjes. Për shkak të dëmtimit dhe diskutimit me klubin, nuk u grumbullua. Dajsinani është një portier shumë i shpejtë me këmbë. Më ka surprizuar dhe pëlqyer shumë.”, deklaroi trajneri.
/CNA
