Dy ndeshjet e para të javës së 12-të në Superiore nisën me spektakël.
Egnatia tregoi forcën ndaj Bylisit, duke triumfuar me rezultatin e thellë 5-1. Kampionët ishin më kërkues nga fillimi dhe gjetën avantazhin që në minutën e 5-të, pas një autogoli të Kane. I njëjti lojtar u bë protagonist edhe në minutën e 16-të, kur u ndëshkua me karton të kuq, pas një ndërhyrje të ashpër ndaj Ndrecës, duke lënë miqtë me 10 lojtarë.
Këtë Egnatia e shfrytëzoi në maksimum dhe në minutën e 25-të dyfishoi shifrat me Bakayoko. Pjesa e parë u mbyll me këtë rezultat, ndërsa e dyta prodhoi edhe më shumë gola.
Në minutën e 49-të, Yahaya realizoi të tretin për Egnatian, duke shtyrë në rrjetë një top nga Ndreca.
Bakayoko plotësoi dopietën personale në minutën e 62-të, duke shënuar nga penalltia, ndërsa pesë minuta më vonë, miqtë shënuan golin e nderit me Muktar.
Ndeshjen e vulosi Buric në minutën e 86-të, kur shënoi edhe të pestin për Egnatian, e cila falë kësaj fitoreje ngjitet në kuotën e 22 pikëve në vendin e tretë.
Bylis renditet në vendin e shtatë me 12 pikë.
Në duelin tjetër, Teuta fitoi minimalisht në “Niko Dovana” ndaj Vorës. Durrsakët iu falën një goli të shënuar nga Blerim Kotobelli në minutën e 68-të, për të marrë 3 pikë të arta.
Në fund Vora ia doli të gjejë barazimin, por goli u anulua. Me këtë sukses, Teuta shkon në kuotën e 18 pikëve në vendin e pestë, ndërsa Vora me 4 pikë më pak, mban vendin e gjashtë.
