Nuk luan në Europë, por Skënderbeu di si të fitojë nga Europa! Pak ditë më parë, korçarët huazuan te Vllaznia sulmuesin Charles Bismark.
Ganezi u huazua te shkodranët vetëm për kupat e Europës, ndërsa ka lënë menjëherë shenjë.
Në fitoren e kuqebluve ndaj Vikingur, Bismark ishte një nga më të mirët në fushë, ose ndoshta më i miri. Nga kjo paraqitje e 24-vjeçarit, te Skënderbeu kanë nisur të fërkojnë duart.
LEXO EDHE: E papritur te Vllaznia! Martini “përjashton” lojtarin, gati largimi
“Vetëm Sport” mëson ekskluzivisht se korçarët po përgatisin shitjen e sulmuesit. Paraqitja e shkëlqyer në Europë, shton interesimet dhe bën që juglindorët të rrisin çmimin e lojtarit.
Bismark pritet të shitet këtë verë, me Skënderbeun që pret të arkëtojë rreth 400 mijë euro. Lojtari ka edhe dy vite kontratë me bardhekuqtë, ndërsa në “Transfermarkt” vlerësohet 250 mijë euro.
E ardhmja e lojtarit duket jashtë Shqipërisë, pasi është e vështirë të mendosh se një ekip në Superiore mund të paguajë këtë shifër për lojtarin.
