Një lëvizje e bujshme po përgatitet në prapaskenat e futbollit shqiptar, ku biznesmeni më i fuqishëm në vend, Samir Mane, mund të bëhet shumë shpejt pjesë e këtij sporti.
Përmes një videoje të postuar së fundmi, Mane shfaqet krah presidentit të FSHF-së, Armand Duka, i cili nuk i ka kursyer elozhet, duke e cilësuar atë si menaxhuesin më të mirë në Shqipëri.
Gjatë bisedës, Mane pranoi se Duka po tenton ta bindë për të investuar seriozisht në futboll, duke i bërë thirrje të marrë nën menaxhim një klub.
Burime ekskluzive për “VETËM SPORT”, bëjnë me dije se klubi që mund të kalojë në pronësinë e Samir Manes është pikërisht Tirana. Klubi bardheblu po kalon një periudhë tejet të vështirë nën drejtimin e Refik Halilit, me probleme të shumta që janë reflektuar edhe në fushë.
Ky ngërç mund të detyrojë Halilin të tërhiqet, duke i hapur rrugë kalimit të aksioneve te biznesmeni i njohur, një lëvizje që do të ndryshonte rrënjësisht balancat e fuqisë në Kategorinë Superiore.
