Në çdo vend të botës, apo klub profesionist, nis të mendohet për sezonin e ri, sapo mbyllet i vjetri.
Në këtë situatë, nëse skuadra ka nevojë për ndryshime, zgjidhet drejtori sportiv, më pas trajneri dhe pas këtyre bëhet merkato.
Megjithatë, duket se kjo nuk vlen për klubin e Tiranës në Shqipëri. Skuadra më e titullar e vendit, shpëtoi vetëm në “play out” nga rënia në Kategorinë e Parë sezonin e kaluar dhe duket se me të njëjtin fat do të përballet edhe këtë edicion.
Pas dy javëve kampionat, drejtuesit vendosën të largojnë trajnerin Vangjel Mile dhe në stol kanë ulur Robeto Bordin.
Deri këtu është gjithçka në rregull, por ajo që duket absurde është situata e drejtorit sportiv. Pak ditë pasi është mbyllur merkato, Tirana është kujtuar të zgjedhë drejtorin e ri sportiv, post të cilin e ka marrë Omer Bunjaku.
Në çdo klub drejtori sportiv zgjidhet para merkatos, për të bërë lëvizjet në verë, ndërsa të Tirana ndodh e kundërta. Mbyllet merkato, pastaj zgjidhet drejtori.
