Në futbollin shqiptar kemi parë gjithçka, por kjo e djeshmja në miqësoren Vllaznia–Kukësi mund të hyjë në librin e rekordeve të “ideve brilante”.
Pa të drejta televizive, ndeshja po transmetohej “live” në Facebook nga “VeriuSport” i gazetarit Gasper Marku, një dhuratë e vogël, por me vlerë të madhe për tifozerinë kuqeblu në emigrim, e cila e sheh ekipin vetëm përmes ekranit.
Qindra tifozë nga mbarë bota po shijonin ndeshjen të paktën deri në pushim. Sapo nisi pjesa e dytë, drejtuesit e klubit kujtuan papritur se ndeshja ishte “sekrete” dhe kërkuan ndërprerjen e transmetimit. Arsyeja zyrtare? Ishte një test dhe skemat duhej të mbeteshin në errësirën e misterit, ndonëse në stadium ato po shiheshin live nga dhjetëra sy.
Në futbollin normal, sekreti mbahet duke mbyllur dyert dhe duke lajmëruar paraprakisht. Por në Shkodër, duket se sekreti zbulohet në pjesën e parë dhe mbyllet në të dytën një risi taktike që, me shumë gjasë, nuk do ta kopjojë askush.
Rezultati? Amatorizëm i pastër dhe një shuplakë për qindra tifozë që u privuan nga mundësia për të parë ekipin e zemrës.
/Shkodra Sot
