Flamurtari është rikthyer këtë sezon në Superiore pas një mungese pesëvjeçare. Kuqezinjtë synojnë të jenë konkurrues dhe të luftojnë për objektiva madhorë në elitën e futbollit shqiptar.
Drejtuesit e klubit kanë investuar jo vetëm në përforcimin e ekipit, por edhe në përmirësimin e infrastrukturës. Prej muajsh po kryhen punime në stadium, të cilat janë drejt përfundimit në kohë rekord.
Ndërhyrjet përfshijnë ndërrimin e sistemit të ndriçimit, çka mundëson zhvillimin e ndeshjeve edhe në orare mbrëmjeje. Gjithçka po përgatitet për takimin me Egnatian, i cili është parashikuar të luhet më 28 shtator në orën 19:00.
Ky do të jetë një test i rëndësishëm si për skuadrën, ashtu edhe për kushtet e reja të stadiumit. Flamurtari kërkon që rikthimi në elitë të shoqërohet me një prezantim dinjitoz në çdo aspekt.
