Vllaznia po vijon ecurinë pozitive në Kategorinë Superiore, duke konsoliduar pozicionin si lidere e kampionatit pas fitores 2-1 ndaj AF Elbasanit në “Loro Boriçi”.
Ndeshja, e cila u vendos nga një gol i Kevin Dodajt në minutat shtesë, u shënua edhe nga momente tensioni dhe përplasje fizike mes lojtarëve dhe stafeve në përfundim të saj. Me këtë sukses, shkodranët kanë arritur të rrisin distancën në renditje, duke u shkëputur me pesë pikë nga ndjekësi më i afërt, Egnatia, e cila u ndal në një barazim 1-1 nga Vora.
Aktualisht, Vllaznia kryeson tabelën me 48 pikë pas 24 javësh, duke dhënë një sinjal të fortë për pretendimet e saj për titullin kampion.
Rezultati i fundit ka sjellë një atmosferë entuziaste në kampin kuqeblu, gjë që është pasuar edhe me shpërblime financiare nga drejtuesit.
Presidenti i klubit, Alban Xhaferi, ka mbajtur premtimin e dhënë përpara ndeshjes duke shpërndarë një premio prej 10 mijë eurosh për ekipin menjëherë pas triumfit. Ky motivim ekstra vjen në një moment kyç të sezonit, kur Vllaznia numëron një seri prej shtatë fitoresh radhazi në kampionat. Shpërblimi synon të mbajë lart moralin e grupit në prag të ndeshjeve vendimtare, ndërsa vëmendja e shkodranëve tashmë zhvendoset te sfida e radhës në transfertë kundër Bylisit.
