Kryeministri Edi Rama ishte i pranishëm në “Santiago Bernabeu”, ku ndoqi ndeshjen mes Real Madrid dhe Villarreal, e mbyllur me fitoren 3-1 të madrilenëve.
Gjatë qëndrimit në stadium, Rama u pa krah presidentit të Real Madrid, Florentino Perez. Ky takim shënon një hap përpara në drejtim të një marrëveshjeje të rëndësishme që pritet të arrihet mes klubit spanjoll dhe palës shqiptare.
Sipas deklaratave të mëparshme të administratorit të Flamurtarit, Sinan Idrizi, Real Madrid pritet të investojë rreth 20 milionë euro në këtë projekt. Marrëveshja parashikohet të ketë lidhje të drejtpërdrejtë me klubin vlonjat.
Një pjesë e bashkëpunimit pritet të përfshijë ngritjen e shkollave të futbollit në Shqipëri. Synimi është zhvillimi i talenteve të rinj dhe përmirësimi i infrastrukturës sportive në vend.
