Klubi i Gramozit nga Erseka ka kaluar në pronësi të një grupi investitorësh italianë, duke hapur kështu një fazë të re në historinë e tij.
Marrëveshja është zyrtarizuar sot, ndërsa investitorët kanë bërë të ditur synimin për ta kthyer klubin në një qendër të rëndësishme të futbollit shqiptar. Njëri prej tyre, Gerardo Masucci, ka theksuar se projekti parashikon zhvillimin e skuadrës në aspekte sportive dhe organizative.
Ai shtoi se qëllimi është ngritja e Gramozit në Kategorinë Superiore, me afrimin e lojtarëve të huaj dhe përmirësimin e infrastrukturës. Masuçi njoftoi gjithashtu se Gramozi do të luajë një ndeshje bamirësie me Napolin, e cila pritet të zhvillohet në Ersekë.
Kryetari i Bashkisë Kolonjë, Erion Isai, e cilësoi këtë investim si një mundësi të madhe për qytetin dhe për zhvillimin e sportit lokal. Ai njoftoi se projekti do të përfshijë ndërtimin e një kompleksi të ri sportiv dhe të një hoteli me kushte të përshtatshme për ekipe dhe akademi.
Synimi është që Erseka të kthehet në një qendër stërvitore për skuadrat shqiptare. Isai shtoi se kjo nismë do të ndikojë pozitivisht edhe në turizëm dhe ekonomi.
Gjatë muajit tetor, pritet një vizitë e presidentit të FSHF-së, Armand Duka, për të parë mundësitë e bashkëpunimit në investimet sportive. Klubi i Gramozit ka pasur edhe më parë momente historike, duke sjellë në Shqipëri Real Madridin për një ndeshje miqësore në stadiumin “Qemal Stafa”.
