Arbenit Xhemajli e ka mbyllur me Egnatian dhe pritet të jetë përforcimi më i ri i klubit kazak Aktobe.
Marrëveshja mes dy klubeve është arritur plotësisht dhe mbrojtësi kosovar do të nisë një kapitull të ri në Kazakistan, ku sezoni futbollistik starton pas vetëm pak ditësh.
Sinjalet për këtë largim i dha vetë Xhemajli fill pas fitores ndaj Dinamos, duke konfirmuar kështu ndarjen me kampionët e Shqipërisë ku ishte shndërruar në një lider të padiskutueshëm të prapavijës.
Ky transferim mbush arkën e klubit rrogozhinas, por njëkohësisht lë një boshllëk të madh në formacionin e trajnerit Edlir Tetova, duke qenë se Xhemajli ishte ndër lojtarët më të rëndësishëm dhe bënte pjesë në treshen e më të paguarve të ekipit bashkë me Aleksin dhe Fernandon.
Ndërkohë që procedurat e prezantimit po finalizohen, Egnatia po vijon përgatitjet pa shtyllën e mbrojtjes për duelin e radhës ndaj Partizanit, i cili do të luhet këtë të shtunë në “Arena e Demave”.
