Trajneri i Vllaznisë, Edi Martini, mund të përballet me masë disiplinore nga FSHF pas ndeshjes ndaj Dinamos.
Pas përfundimit të takimit, Martini është parë duke bërë disa gjeste gjatë festës së fitores. Këto veprime pritet të shqyrtohen nga organet përkatëse.
Sipas nenit 14 të Kodit të Disiplinës Sportive, dënimet për raste të tilla variojnë nga një ndeshje pezullim deri në gjashtë muaj, në varësi të vlerësimit të sjelljes.
PJESA E KODIT TË DISIPLINËS SPORTIVE QË PËRFSHIN GJESTET ANTISPORTIVE
Neni 14 Sjellja e gabuar e lojtarëve dhe zyrtarëve
- – Shkeljet e mëposhtme të kryera nga lojtarët ose zyrtarët do të dënohen me pezullim nga veprimtaritë dhe në varësi të rrethanave edhe me gjobë:
- b- të paktën 1 (një) ndeshje ose një periudhë të përshtatshme kohe për sjellje jo sportive ndaj një kundërshtari ose një personi tjetër përveç një zyrtari të ndeshjes;
f. – të paktën 2 (dy) ndeshje për provokimin e spektatorëve në një ndeshje me çdo mënyrë ose mjet;
2- Sjellja e gabuar e përshkruar në paragrafin 1 në pikat b), f), j) dhe k) dënohet sipas këtij Kodi, pavarësisht nëse shkelja është kryer jashtë fushës së lojës (përfshirë rrjetet sociale).
4- Një lojtar ose zyrtar i cili, në kuadrin e një ndeshje (përfshirë kohën para dhe pas ndeshjes) ose veprimtarie, nxit publikisht të tjerët për urrejtje ose dhunë do të dënohet me ndalimin për të marrë pjesë në çdo veprimtari të lidhur me futbollin jo më pak se 6 (gjashtë) muaj dhe me një gjobë prej të paktën 200.000 (dyqind mijë) Lekë. Në raste të rënda, përveç dënimeve të mësipërme dhe veçanërisht nëse shkelja është kryer me anë të rrjeteve sociale dhe/ose mjeteve të komunikimit masiv (siç janë shtypi, radioja, televizioni ose interneti) apo ndodh në një ditë ndeshje brenda ose përreth një stadiumi, gjoba do të jetë prej të paktën 500.000 (pesëqind mijë) Lekë.
6- Në të gjitha rastet mund të vendosen dënime disiplinore shtesë.
