Fitorja e Egnatias dhe barazimi i Dinamos në ndeshjet e kthimit të Ligës së Konferencës, i kanë vendosur vulën faktit që edhe të paktën për dy edicionet e ardhshme, Shqipëria do të përfaqësohet nga katër skuadra në kompeticionet e UEFA-s.
Rreziku është shmangur përfundimisht edhe për edicionin 2027-2028, si pasojë e pikëve të siguruara nga klubet shqiptare, por edhe eliminimit të skuadrave të kampionateve të tjera që janë poshtë Shqipërisë në renditjen e UEFA-s.
LEXO EDHE: “Bingo” në Europë, zbulohet sa kanë arkëtuar Dinamo dhe Egnatia
Shqipëria për momentin mban vendin e 45-të në renditjen e UEFA-s, por Andorra, Mali i Zi, Gjeorgjia dhe Uellsi që gjenden poshtë saj, kanë të gjitha klubet e eliminuara dhe kësisoj nuk mund të kapërcejnë në renditje. Njëkohësisht, Gjibraltari dhe San Marino që kanë ende ekipe në garë, janë shumë larg sa u përket pikëve ndaj e kanë të pamundur të rikuperojnë aq sa për të kaluar Shqipërinë dhe rrëzuar këtë të fundit poshtë vendit të 50 ku është “vija ndarëse”.
Ndaj mund të thuhet se edhe për dy sezonet e ardhshme, Shqipëria do të vazhdojë të përfaqësohet me katër skuadra në arenën ndërkombëtare, duke shmangur humbjen e një ekipi që do të ishte katastrofik për futbollin në vendin tonë që siguron një pjesë të madhe të të ardhurave nga pjesëmarrja në kompeticionet ndërkombëtare.
/Panoramasport
