Partizani vazhdon momentin e vështirë. Të kuqtë nuk shkuan më shumë se barazimi pa gola ndaj Vorës në stadiumin “Arena e Demave”, në duelin e javës së 10-të në Superiore.
“Demat” e nisën vrullshëm takimin, duke rrezikuar disa herë. Skuka provoi me një gjuajtje të fortë në minutën e 14-të, por u ndal nga portieri Ruçi.
10 minuta më vonë, Kote provoi me një gjuajtje nga jashtë zone, por nuk kishte saktësinë e duhur. Në fund të pjesës së parë, Partizani humbi sulmuesin Skuka, i cili u dëmtua dhe u largua nga fusha i përlotur.
Pak minuta para mbylljes së fraksionit, Vora iu afrua avantazhit me një gjuajtje të Adeloye, që u ndal nga portieri Qirko.
I njëjti autor iu afrua golit edhe në fillimin e pjesës së dytë, por gjuajtja me kokë shkoi mbi portën e Qirkos.
Toma tentoi supergolin në minutën e 62-të me roveshatë, me topin që shkoi larg portës. Të njëjtin fat kishte edhe Tabaku në krahun tjetër, i cili pa gjuajtjen e tij të shkonte mbi traun e portës.
Në minutat e fundit, Partizani u shfaq më kërkues, Isgandarli dhe Janjeva ishin pafat, kur panë gjuajtjet e tyre të shkonin ngjitur me shtyllën.
Mbrojtësi iu afrua golit edhe në fund, por këtë herë u ndal nga tranversa. Në fund, dy ekipet u detyruan të kënaqen me nga një pikë.
Partizani mban vendin e tetë me 9 pikë, ndërsa Vora renditet një vend më sipër, me dy pikë më shumë.
