Tre futbollistë janë proceduar penalisht, pasi dje, përpara fillimit të ndeshjes së futbollit “Iliria-Skënderbeu”, janë konfliktuar në dhomat e zhveshjes, me futbollistët e ekipit kundërshtar.
Të proceduarit janë futbollistët Adolf Selmani, Brajan Selmani dhe pjesëtari i stafit Jornels Selmani.
Ndërkohë, në njoftimin e policisë thuhet se është dëmtuar lehtë një futbollist tjetër.
Njoftimi i policisë:
Specialistët për Hetimin e Krimeve të Komisariatit të Policisë Krujë: referuan materialet në Prokurori, ku nisi procedimi në gjendje të lirë për shtetasit A. S., B. S. dhe J. S., të tre futbollistë, pasi dje, përpara fillimit të ndeshjes së futbollit “Iliria-Skënderbeu”, dyshohet se janë konfliktuar në dhomat e zhveshjes, me futbollistët e ekipit kundërshtar. Si pasojë është dëmtuar lehtë, futbollisti, shtetasi S. N.
Kujtojmë se në momentin e mbërritjes së ekipit të Skënderbeut në stadium, pati një incident mes lojtarëve dhe stafit të klubit Iliria, ku u përfshinë edhe në konfrontime fizike.
Për shkak të këtyre rrethanave dhe problematikave të ngritura për sigurinë, u vendos që ndeshja të mos luhet. Çështja do të shqyrtohet nga komisionet juridike të FSHF-së, të cilat do të marrin vendimin përfundimtar lidhur me këtë ndeshje.
