Sulmuesi kryesor i Partizanit, Xhuliano Skuka, do të jetë në dispozicion të trajnerit Oltijon Kërnaja për derbin e madh ndaj Tiranës.
Pasi shleu pezullimin prej kartonëve në ndeshjen ndaj Bylisit, kapiteni i “Demave” rikthehet në fushë si kërcënimi kryesor për bardheblutë.
Statistikat e Skukës në derbi janë mbresëlënëse: ai numëron 4 gola kundër Tiranës me fanellën e Partizanit, ku në tri raste kur ai ka shënuar, skuadra e tij ka dalë fituese.
Skuka njihet si “makthi” i Tiranës edhe në Kupën e Shqipërisë, ku ka shënuar kundër tyre edhe kur luante për Korabin dhe Dinamon, duke shkaktuar eliminimin e bardhebluve në të dyja rastet.
Prezenca e tij në fushë i jep një garanci më shumë Partizanit në një prej sfidave më vendimtare të sezonit. Rikthimi i kapitenit vjen në momentin e duhur për të udhëhequr sulmin e kuq në këtë përballje historike.
