Shqipëria dhe Kosova kanë siguruar fitore të rëndësishme këtë javë në ndeshjet kualifikuese të Botërorit 2026, duke u pozicionuar në vendin e dytë të grupeve përkatëse. Me këtë ecuri, të dyja kombëtaret janë një hap larg sigurimit të pjesëmarrjes në fazën e play-off-it të zonës europiane. Sipas formulës aktuale, në këtë fazë marrin pjesë 12 skuadrat e dyta të grupeve, si dhe 4 skuadra shtesë që vijnë nga renditja e Ligës së Kombeve.
Në bazë të situatës pas ndeshjeve të fundit, Shqipëria dhe Kosova ndodhen në vazon e tretë të shortit. Renditja nëpër vazo përcaktohet nga pozicioni i skuadrave në klasifikimin e FIFA-s, përveç katër skuadrave që kualifikohen përmes Ligës së Kombeve, të cilat vendosen automatikisht në vazon e katërt.
Sistemi i play-off-it parashikon ndeshje gjysmëfinale me eliminim direkt, ku një skuadër e vazos së dytë është pritëse kundër një skuadre të vazos së tretë. Po ashtu, një skuadër e vazos së parë pret në shtëpi një kundërshtar nga vazoja e katërt. Fituesit e këtyre çifteve përballen në finale teke, me fushën pritëse që përcaktohet me short.
Në përbërjen aktuale të vazove, katër kundërshtarët e mundshëm për Shqipërinë dhe Kosovën janë Skocia, Hungaria, Çekia dhe Sllovakia.
Vazoja e parë përfshin Italinë, Turqinë, Ukrainën dhe Poloninë; e dyta përbëhet nga Skocia, Hungaria, Çekia dhe Sllovakia; në të tretën janë Shqipëria, Maqedonia e Veriut, Bosnja e Hercegovina dhe Kosova; ndërsa në të katërtën Uellsi, Rumania, Suedia dhe Irlanda e Veriut.
VAZOT E PLAY-OFF
VAZO 1: Itali, Turqi, Ukrainë, Poloni
VAZO 2: Skoci, Hungari, Çeki, Sllovaki
VAZO 3: Shqipëri, Maqedoni, Bosnjë Hercegovinë, Kosovë
VAZO 4: Uells, Rumani, Suedi, Irlandë e Veriut
