Partizani mbetet klubi i vetëm në Superiore, që nuk ka një trajner në prag të sezonit të ri. Situatë që tashmë e ka kaluar një javë. Me nisjen e kampionatit të planifikuar më 23 gusht, “demat” ndodhen ende në një situatë të paqartë.
LEXO EDHE: Rikthim i bujshëm te Partizani, gati firma me sulmuesin. Zbulohen detajet
Pas dorëheqjes së Skënder Gegës të mërkurën e kaluar, drejtimi i skuadrës në seancat stërvitore është marrë përkohësisht nga Fatjon Muhameti. Ky i fundit është trajner i ekipit U-19. Largimi i Gegës erdhi pas eliminimit nga Kalju në raundin e parë të Ligës së Konferencës, një dështim që prishi objektivat e klubit dhe i dha fund për të dytën herë aventurës së Gegës si trajner i Partizanit.
Që nga ajo ditë, Partizani është vënë në kërkim të pasuesit të tij duke shqyrtuar me kujdes profile të ndryshme, ku përfshihen trajnerë të huaj si Moriero, Cvitanoviç dhe Milinkoviç. Presioni për të bërë një zgjedhje të saktë është i lartë.
Gega përfaqësonte një figurë të rëndësishme për klubin. Jo vetëm si trajner i shpallur më parë kampion, por edhe si dikush që kishte mbështetjen e tifozëve. Pas largimit të tij të parë në vitin 2019, Partizani zgjodhi t’i besonte një profili italian si Franko Lerda, i cili pati një ecuri të shkurtër, por arriti të fitonte Superkupën.
Në fund u largua me shijen e hidhur të humbjes së derbit me Tiranën pas disa viteve. Sot, tre javë nga starti i kampionatit, Partizani ndodhet në udhëkryq. Sezoni ka nisur dhe skuadra ka nevojë për udhëheqës në stol.
/Panoramasport
