Portieri i përfaqësueses së Kosovës, Visar Bekaj, është zyrtarisht lojtari më i ri i Tiranës.
28-vjeçari ka arritur marrëveshjen me presidentin Refik Halili dhe ka hedhur firmën mbi kontratë, duke u rikthyer te skuadra me të cilën u shpall kampion i Shqipërisë.
Bekaj vjen në kryeqytet pas mbylljes së aventurës në Turqi me ekipin e Hatayspor, lëvizje kjo e diktuar nga problemet financiare të klubit turk.
Me një përvojë të konsiderueshme dhe tetë ndeshje të zhvilluara me fanellën e Kosovës, gardiani pritet të blindojë portën e bardhebluve për pjesën e mbetur të sezonit.
Ky transferim përforcon ndjeshëm organikën e Tiranës, duke i ofruar stafit teknik një element cilësor për arritjen e objektivave në kampionat.
Bekaj do të vihet menjëherë nën urdhrat e trajnerit për të nisur përgatitjet me grupin.
