Arafat Doumbia zhvilloi ndeshjen e parë me Partizanin në transfertën ndaj Vllaznisë. Ai hyri në fushë në minutën e 60-të duke marrë vendin e Redon Ismailit dhe solli ndryshim në mesfushë.
Futbollisti 20-vjeçar nga Bregu i Fildishtë u pa aktiv dhe i dha më shumë siguri skuadrës në atë fazë të lojës. Në minutat shtesë, Doumbia pësoi një tërheqje muskulore dhe u detyrua të largohej nga fusha me probleme.
Pikërisht në ato momente, Vllaznia përfitoi dhe shënoi golin e katërt. Pas kontrollit mjekësor u konfirmua se mesfushori do të qëndrojë jashtë fushave për rreth katër javë. Kjo periudhë do ta mbajë larg në tri ndeshje të rëndësishme të Superiores.
Partizani nuk do ta ketë në dispozicion kundër Elbasanit, në transfertën me Bylisin dhe në derbin ndaj Tiranës. Doumbia u bashkua me të kuqtë në fund të muajit gusht, duke treguar menjëherë nivel të lartë në stërvitje. Klubi kryeqytetas e afroi nga CR Belouizdad i Algjerisë, duke firmosur kontratë afatgjatë deri në vitin 2029 me opsion rinovimi.
