Egnatia u eliminua në raundin e tretë të Conference League nga Olimpija Ljubljana, pas humbjes 4-2 në Shqipëri.
Përveç rezultatit sportiv, klubi është ndëshkuar rëndë nga UEFA për sjelljen e tifozëve dhe ekipit. Në ndeshjen e 14 gushtit, Egnatia mori gjoba që arrijnë në 60,000 €, përfshirë 5,000 € për sjellje të papërshtatshme të skuadrës, 45,000 € për hedhje sendesh në fushë dhe 10,000 € për transmetim mesazhi të papërshtatshëm.
Edhe Olimpija Ljubljana u gjobit me 15,125 € në ndeshjen e parë për shkak të hedhjes së sendeve nga tifozët.
Për Egnatian, kjo është hera e parë që përballet me dënime të tilla në arenën ndërkombëtare. Klubi kishte marrë më herët edhe disa gjoba të tjera: 7,000 € për sjellje jo sportive në ndeshjen e 7 gushtit dhe dy herë nga 6,000 € kundër Breidablik.
Në total, gjobat e Egnatias në këtë edicion arrijnë në 79,000 €, duke e bërë ekipin shqiptar më të penalizuar financiarisht.
