Ndeshja mes Apolonisë dhe Pogradecit, e vlefshme për Kategorinë e Parë, përfundoi në barazim 2-2 pas një fundi me tensione të larta.
Sfida u vendos në minutën e 97-të, kur futbollisti Zguro realizoi një penallti për skuadrën e Pogradecit. Gjyqtari Dorjan Maletaj akordoi 11-metërshin në minutën e 88-të për një prekje të topit me dorë, vendim i cili shkaktoi protesta të ashpra nga radhët e Apolonisë.
Si shenjë revolte, ekipi fierak u tërhoq nga fusha duke u drejtuar drejt dhomave të zhveshjes. Pas disa minutash ndërprerje, lojtarët e Apolonisë u rikthyen për të vijuar lojën.
Realizimi i Zguros bëri që skuadrat të ndanin nga një pikë në këtë përballje. Ky barazim mban Pogradecin në vendin e tretë të klasifikimit, ndërsa Apolonia mbetet në mesin e tabelës.
Ngjarja pritet të shqyrtohet nga organet disiplinore për shkak të ndërprerjes së përkohshme.
