Ndeshja mes Partizanit dhe Elbasanit, e vlefshme për javën e 22-të të Superiores, u përfshi nga tensioni në minutën e 65-të, menjëherë pas përmbysjes së rezultatit në favor të ekipit të Partizanit.
Gjatë festimit të golit të shënuar nga Vusal Isgandarli, ndërsa lojtarët po përgatiteshin për të rinisur lojën, u raportua për një incident në tribunën VIP.
Sipas “RTSH”, futbollisti Isgandarli u godit nga sende të hedhura prej tifozëve të Elbasanit. Lojtari u shtri në fushë dhe kërkoi ndërhyrjen e menjëhershme të stafit mjekësor për të marrë ndihmën e parë.
Pas disa minutash trajtimi, stafi teknik i Partizanit vendosi të kryejë zëvendësimin e tij. Pavarësisht incidentit, ndeshja vijoi rregullisht, ndërsa pritet që komisionet disiplinore të shqyrtojnë ngjarjen bazuar në raportet e delegatëve.
