Aventurës së Francesco Morieros në krye të Flamurtarit po i vjen fundi. Palët pritet të ulen së shpejti për të diskutuar zgjidhjen e kontratës me konsensus, me qëllim shmangien e kostove financiare për klubin.
Ndërkohë, bordi drejtues i udhëhequr nga Sinan Idrizi po shqyrton disa skenarë për pasuesit e tij. Opsioni më i mundshëm për momentin është besimi i stolit dyshes Andi Ribaj dhe Lejdi Liçaj deri në fund të sezonit.
Idrizi raportohet se ka mbetur i kënaqur nga mënyra se si dyshja e menaxhoi ekipin në ndeshjen ndaj Partizanit, pavarësisht humbjes, duke vlerësuar njohjen e tyre të mirë të ambientit vlonjat.
Megjithatë, në prapaskenë qarkullojnë edhe emra të tjerë me peshë; tifozëria pëlqen rikthimin e dyshes Gentian Mezani dhe Eqerem Memushi, të cilët shihen si shpëtimtarë në këtë situatë delikate, ndërsa mbetet gjithmonë e hapur edhe pista që çon te Julian Ahmataj.
