Klubi i Partizanit ka zyrtarizuar afrimin e mesfushorit Kamer Qaka, i cili bëhet blerja e parë e drejtorit të ri sportiv, Agim Ibraimi.
Ish-lojtari i Kombëtares shqiptare ka nënshkruar një kontratë që e lidh me të kuqtë për një vit e gjysmë. Pas prezantimit zyrtar në ambientet e klubit, 30-vjeçari është vënë menjëherë nën urdhrat e trajnerit Oltion Kërnaja.
Kjo do të jetë aventura e parë në kampionatin shqiptar për mesfushorin e lindur në Pejë. Më parë, Qaka ka qenë pjesë e Shkëndijës së Tetovës, ku u shpall dy herë kampion dhe pati aktivizime të rregullta në arenën ndërkombëtare.
Karriera e tij përfshin gjithashtu eksperienca në Norvegji me klube si Sarpsborg dhe Raufoss, si dhe në Rumani me Steauan e Bukureshtit e Poli Iasi. Së fundmi, lojtari ka qenë pjesë e kampionatit hungarez me skuadrën e Mezokovesd. Qaka ishte dhe objektiv i Tiranës në këtë merkato dimri, por Partizani ka arritur të mbyllë shpejt akordin.
