Klubi i Laçit vazhdon të jetë protagonist në merkato, duke përforcuar repartin ofensiv me sulmuesin Joel Doukouo.
Në një kohë kur gara për ngjitjen në Kategorinë Superiore është bërë mjaft intensive, kurbinasit kanë lëvizur shpejt për të siguruar shërbimet e 23-vjeçarit, i cili vjen pas një eksperience te Teuta.
Ndonëse gjatë këtij sezoni te durrsakët nuk arriti të gjente rrugën e rrjetës për shkak të hapësirave të kufizuara, Doukouo njihet si një sulmues me potencial që e njeh mirë kampionatin shqiptar.
Më herët ka mbajtur veshur fanellat e Egnatias dhe Elbasanit, ku shkëlqimin e tij e kishte te rrogozhinasit.
Spikat fakti se ka shënuar gol në kompeticionet evropiane, konkretisht në Conference League, çka dëshmon përvojën e tij në nivele të larta.
Sulmuesi pritet të sjellë freski dhe forcë goditëse për ekipin bardhezi, që synon me çdo kusht rikthimin në elitën e futbollit shqiptar.
