Sulmuesi 18-vjeçar Oniks Grezda do të vazhdojë karrierën te skuadra e Dritës në Kosovë.
Futbollisti vjen pas një eksperience në Shqipëri, ku gjatë pjesës së parë të sezonit ishte pjesë e ekipit të Kukësit. Grezda, i cili luan kryesisht në krahun e majtë të sulmit, rikthehet kështu në kampionatin e Kosovës pas periudhave me klube të ndryshme.
Karriera e tij nisi te Ferizaj, nga ku më pas u transferua te Skënderbeu përpara se të kalonte te verilindorët. Gjatë qëndrimit të tij te Kukësi, lojtari regjistroi gjithsej 31 ndeshje zyrtare dhe shënoi katër gola.
Largimi i tij nga klubi shqiptar është konfirmuar zyrtarisht nga vetë lojtari përmes një njoftimi në rrjetet sociale. Tashmë sulmuesi i ri do t’i bashkohet organikës së klubit gjilanas për pjesën e mbetur të sezonit.
