Mesfushori vlonjat, Bruno Telushi, ka zyrtarizuar kalimin e tij te skuadra e Orikut për pjesën e mbetur të sezonit.
Ish-kapiteni i Flamurtarit dhe Partizanit ka zgjedhur të vazhdojë karrierën në Kategorinë e Dytë, duke surprizuar me këtë lëvizje në merkato.
Drejtuesit e Orikut njoftuan arritjen e marrëveshjes me futbollistin, i cili vjen me një eksperiencë të pasur në futbollin shqiptar.
Ky transferim shihet si një lëvizje strategjike e klubit, që synon ngjitjen e menjëhershme në Kategorinë e Parë.
Telushi pritet të sjellë lidership dhe cilësi teknike në mesfushën e ekipit të tij të ri.
Përveç forcimit të organikës, përvoja e tij do të shërbejë edhe si një pikë referimi për lojtarët më të rinj. Klubi shprehu bindjen se mesfushori do të jetë një vlerë e shtuar për realizimin e objektivave sportivë.
Oriku aktualisht po rivalizon fort me Partizanin B në garën për kreun e renditjes.
