Mateo Kocijan është zyrtarisht futbollisti më i ri i skuadrës kroate Tehnicar 1974. Mesfushori 30-vjeçar ka vendosur të rikthehet në atdhe pas përfundimit të përvojës së tij në Indonezi me ekipin e PERSIB.
Kocijan është një emër i njohur për publikun shqiptar, pasi gjatë vitit 2023 ishte pjesë e Partizanit në Superiore. Periudha e tij me “të kuqtë” zgjati vetëm pak muaj dhe u konsiderua si një dështim në merkaton e klubit kryeqytetas.
Gjatë qëndrimit në Shqipëri, kroati u aktivizua në 14 ndeshje zyrtare por nuk la gjurmë. Ai u largua nga Partizani pa shënuar asnjë gol dhe pa dhuruar asnjë asist për shokët e skuadrës.
Tashmë te Tehnicar, mesfushori kërkon të rigjejë formën e tij më të mirë në një mjedis familjar. Ky rikthim në Kroaci shënon një kapitull të ri në karrierën e tij pas disa lëvizjeve jashtë shtetit.
