Kombëtarja shqiptare mbylli një edicion historik të eliminatoreve të Botërorit 2026, duke siguruar për herë të parë në histori pjesëmarrjen në “Play-Off”.
Shqipëria grumbulloi 14 pikë në 8 ndeshje, me 4 fitore, 2 barazime dhe 2 humbje, të dyja ndaj Anglisë. Trajneri Silvinjo aktivizoi gjithsej 25 lojtarë, ndërsa Asllani ishte i vetmi që luajti çdo minutë të të gjitha ndeshjeve.
Më pak të përdorur ishin Mihaj, Kastrati dhe Tuci, ndërsa Medon Berisha nuk u aktivizua fare. Rei Manaj ishte golashënuesi më i mirë me 3 gola, ndërsa Asllani shënoi 2 dhe Uzuni 1.
Në total, kuqezinjtë realizuan 7 gola, ndërsa pësuan 5 gola. Katër futbollistë kontribuuan me nga një asist. Tani ekipi është përqendruar te shorti i së enjtes, që do të përcaktojë kundërshtarin në play-off-in e marsit.
