Klubet shqiptare që përfaqësojnë vendin në arenën ndërkombëtare, përveç anës sportive, po përjetojnë edhe një ndikim të konsiderueshëm në aspektin financiar. Dinamo dhe Egnatia, të cilat janë pjesë e turit të tretë të Conference League, kanë përfituar ndjeshëm nga shpërblimet e ofruara nga UEFA për çdo etapë të kaluar.
Për Dinamon, e cila ka arritur një ecuri pozitive që nga raundi i parë, përfitimet deri më tani kapin shifrën e rreth 1.4 milionë eurove, pa përfshirë të ardhurat nga të drejtat televizive dhe marketingu. Ky total është ndërtuar sipas skemës së shpërblimeve të përcaktuara nga UEFA: pjesëmarrja në turin e parë eliminator i ka sjellë klubit nga kryeqyteti 150 mijë euro, ndërsa kalimi në çdo raund tjetër është shpërblyer me nga 175 mijë euro. Faza e dytë e Conference League ka sjellë një shtesë prej 350 mijë eurosh, ndërsa kalimi në turin e tretë është shpërblyer me 550 mijë të tjera.
LEXO EDHE: Nuk ka dyshime! Ja me sa ekipe do të përfaqësohet Shqipëria në Europë për dy vitet e ardhshme
Përballja e radhës për Dinamon do të jetë ndaj Hajdukut të Splitit. Në rast të një tjetër suksesi, përveç 175 mijë eurove që jepen për kualifikimin, klubi do të siguronte edhe hyrjen në fazën play-off të Conference League. Vetëm pjesëmarrja në atë raund garanton një shumë fikse prej 750 mijë eurosh, duke e çuar totalin potencial të fitimeve në nivele edhe më të larta.
Situatë e ngjashme paraqitet edhe për Egnatian, që ndonëse rrugëtimin europian e nisi nga raundi i parë eliminator i Champions League, tashmë ndodhet në të njëjtën fazë të Conference League si Dinamo. Klubi nga Rrogozhina është përballë një sfide me Olimpija Ljubljana-n e Sllovenisë, një përballje që mund të jetë vendimtare për kalimin në raundin play-off. Ashtu si Dinamo, edhe Egnatia do të përfitojë nga struktura e shpërblimeve të UEFA-s në rast të kualifikimit, me bonusin për fazën e ardhshme dhe sigurimin automatik të 750 mijë eurove për hyrjen në play-off.
Nëse Egnatia arrin të përmbushë objektivin, atëherë dy klube shqiptare do të jenë shumë pranë fazës së grupeve të Conference League, kompeticioni i tretë më i rëndësishëm në Europë.
