Federata Shqiptare e Futbollit ka zyrtarizuar rinovimin e kontratës me trajnerin Silvinjo dhe ndihmësit e tij, Pablo Zabaleta e Dorival Guidoni Junior.
Marrëveshja e re do të jetë e vlefshme deri në korrik të vitit 2026, duke synuar kualifikimin në fazën finale të Kupës së Botës. Kontrata e mëparshme e teknikut brazilian kishte përfunduar më 31 dhjetor 2025. Kohëzgjatja prej vetëm gjashtë muajsh tregon se ky mund të jetë cikli i fundit i Silvinjos në drejtimin e kombëtares shqiptare.
Ky afat mbulon ndeshjet e fazës “Play-Off” dhe fazën e grupeve të Botërorit, nëse arrihet kualifikimi. Për shkak të kalendarit të ndeshjeve, ekziston mundësia që trajneri të mos drejtojë më asnjë ndeshje në stadiumin “Air Albania” dhe në Shqipëri.
Ky rinovim i shkurtër interpretohet edhe si një dëshirë e mundshme e vetë trajnerit për të përmbyllur projektin aktual. Gjithashtu, kjo situatë pritet të mos sjellë ndryshime të mëdha në listën e lojtarëve të preferuar prej tij. Përfundimi i këtij bashkëpunimi do të varet tërësisht nga ecuria e Shqipërisë në kompeticionin e ardhshëm botëror.
