Trajneri i Shqipërisë, Silvinjo, foli në konferencë për shtyp, pas publikimit të listës për ndeshjen me Serbinë dhe miqësoren ndaj Jordanisë.
Tekniku kuqezi u pyet edhe për të ardhmen pas sfidës me serbët, por u shpreh se tani duhet të mendohet vetëm për ndeshjen.
“Kam parë ndeshjen e 11 viteve më parë dhe incidentin. Ne jemi përgatitur për një ndeshje futbolli. Kam grumbulluar 25 lojtarë, në mënyrë që të jemi më të përqendruar. Kemi 5-6 ditë me ekipin, ku do të ketë hapësirë për të punuar me lojtarët.
Mungesa e Etrit Berishës? Portierët qe kemi marrë këtë herë, kanë treguar formë të mirë. Po përgatitemi për të ardhmen. Kemi lojtarë të rinj, të cilët grumbullohen. Jemi të kënaqur me listën që kemi bërë dhe do të përgatitemi mirë për këtë ndeshje.
Ndeshja me Serbinë vendos të ardhmen e Silvinjos? Ne do të jemi të përqendruar te Serbia. Nuk është momenti i duhur për të menduar për të ardhmen. Nuk duam të harxhojmë energji me detaje të tjera. Ndeshja me Serbinë është shumë e rëndësishme”, u shpreh Silvinjo.
