Gjatë mbrëmjes Gala të futbollit shqiptar “Topi i Artë”, presidenti i FSHF-së, Armand Duka, deklaroi se futbolli shqiptar ndodhet në një fazë zhvillimi dhe konsolidimi. Ai u ndal edhe te mbështetja financiare për futbollin vendas.
Sipas Dukës, do të akordohen 3 milionë euro për klubet e Kategorisë Superiore dhe Kategorisë së Parë. Shpërndarja e fondeve do të realizohet në dy faza, në fund të secilit gjashtëmujor të sezonit.
Kjo skemë është menduar për shkak të ndryshimeve që ndodhin në renditje dhe lëvizjeve mes kategorive. Klubet e Kategorisë Superiore do të përfitojnë dyfishin e atyre të Kategorisë së Parë. Nga vendi i parë deri në vendin e tetë të Superiores, secili klub do të marrë nga 91.500 euro.
Në Kategorinë e Parë, nga vendi i parë deri në të dhjetin, përfitimi do të jetë 45.000 euro për klub. Dy skuadrat e fundit të Superiores do të përfitojnë sipas kuotës së Kategorisë së Parë.
Ndërkohë, dy skuadrat që ngjiten nga Kategoria e Parë do të përfitojnë shumën prej 91.500 euro. Kjo skemë synon të ruajë balancën financiare mes kategorive gjatë sezonit.
