Flamurtari nuk ka nisur mirë sezonin në Superiore, pasi pas pesë javësh nuk ka siguruar ende asnjë fitore. Skuadra ka grumbulluar vetëm dy pikë dhe aktualisht ndodhet në vendin e parafundit në renditje.
Performanca në fushë nuk ka qenë bindëse, ndërsa trajneri Carlos Garcia ende nuk ka gjetur mënyrën për të nxjerrë ekipin nga kjo situatë.
Presidenti Sinan Idrizi ka zhvilluar një takim me lojtarët, ku ka kërkuar më shumë përqendrim dhe seriozitet në çdo ndeshje. Humbja e fundit me Egnatian në Vlorë ka shtuar pakënaqësinë brenda klubit. Idrizi nuk ka kursyer kritikat për lojtarët, duke kërkuar reagim të menjëhershëm.
Përballja e radhës ndaj Dinamos shihet si shumë e rëndësishme për të ndryshuar ecurinë. Një fitore do të ishte thelbësore për të rikthyer besimin dhe atmosferën pozitive në skuadër.
Sa i përket trajnerit, ndeshja me Dinamon është vendimtare. Në rast se nuk fiton as këtë herë, shkarkimi do të jetë i menjëhershëm. Në kampin vlonjat po shqyrtohen emra të mundshëm për zëvendësimin e Garcias.
Në tregun vendas janë përfolur emrat e Shpëtim Duros dhe Gentjan Mezanit, ndërsa një alternativë e jashtme mund të jetë trajneri italian Françesko Moriero, i cili ka drejtuar më parë Dinamon dhe së fundmi Laçin.
