Elbasani ka shpallur zyrtarisht “non grata” gjyqtarin Kreshnik Cjapi, pas ndeshjes së fundit ndaj Teutës në “Elbasan Arena” që përfundoi 0-0, sipas “Panorama Sport”.
Klubi ka reaguar ashpër për vendimet e arbitrit, duke theksuar se janë evidentuar 13 raste të gabimeve në dhënie ose mosdhënie faulli në dëm të skuadrës. Sipas Elbasanit, këto vendime kanë ndikuar në ritmin e lojës dhe kanë ulur kohën efektive të ndeshjes. Në ankesën e dorëzuar në FSHF, theksohet se arbitri nuk ka arritur standardin e kërkuar për një ndeshje të Superiores.
Verdheblutë kanë rikujtuar edhe një episod të ndodhur në javën e dytë kundër Egnatias. Atëherë, Cjapi anuloi një gol të Elbasanit pas ekzekutimit të një penalltie, duke akorduar faull indirekt në vend që të urdhëronte përsëritjen e goditjes. Klubi shprehet se ky vendim ishte në kundërshtim me rregulloren ndërkombëtare të FIFA-s.
Elbasani e sheh këtë si përsëritje të gabimeve që dëmtojnë garën dhe ndikojnë në barazinë e kampionatit. Për këtë arsye, kanë kërkuar ndërhyrjen e institucioneve përkatëse të futbollit shqiptar. Ndërkohë, edhe pse kanë dërguar më herët një kërkesë për sqarime pas ndeshjes në Rrogozhinë, këtë herë klubi kërkon masa konkrete ndaj gjyqtarit. Pavarësisht polemikave, Elbasani vazhdon të mbetet në krye të renditjes.
