Vedat Muriqi ka shënuar dy gola në ndeshjen e sotme të Mallorkas kundër Athletic Bilbaos, e vlefshme për La Ligën.
Pjesa e parë e këtij takimi u mbyll në barazim 2-2, ku sulmuesi i Kosovës realizoi fillimisht në minutën e pestë.
Në minutën e 42-të, ai shënoi golin e dytë personal pasi ndoqi topin e pritur nga portieri pas goditjes së penalltisë.
Me këto dy realizime, Muriqi arrin kuotën e 13 golave në 20 javë kampionat, duke u renditur i dyti në listën e golashënuesve pas Kylian Mbappe. Aktualisht, Mbappe kryeson garën për “Këpucën e Artë” në La Liga me 19 gola të shënuar.
Muriqi është bërë tashmë lojtari i dytë me më shumë gola në historinë e Mallorcas në elitën e futbollit spanjoll. Ky rekord mbahet ende nga ish-sulmuesi Samuel Eto’o.
