Milani është futur fuqishëm në garë për transferimin e Victor Boniface, sulmuesit të Bayer Leverkusen. Objektivi kryesor i klubit kuqezi është përforcimi i repartit ofensiv dhe drejtuesit kanë zgjedhur sulmuesin nigerian si profilin më të përshtatshëm për projektin e ri. Pas një merkatoje të gjatë, ku janë përfolur emra të shumtë si Rasmus Hojlund apo Dusan Vlahovic, Milani ka vendosur të përqendrohet te lojtari i Leverkusenit, duke e vendosur atë në krye të listës së blerjeve.
Victor Boniface, 24 vjeç, sezonin e kaluar kontribuoi me 14 gola në kampionat dhe në kompeticionet e tjera, duke ndihmuar skuadrën e Xabi Alonso-s në arritjen historike të titullit në Bundesliga. Pavarësisht një fillimi të fortë sezoni, sulmuesi nigerian u pengua shpesh nga problemet fizike dhe dëmtimet që e mbajtën për një periudhë të gjatë jashtë fushave të lojës. Pikërisht për këtë arsye, vlera e tij në merkato ka pësuar rënie. Në verën e kaluar, kartoni i tij vlerësohej rreth 60 milionë euro, ndërsa këtë verë shifrat flasin për një çmim prej afërsisht 40 milionësh.
Në ditwt e fundit, drejtori sportiv i Milanit, Igli Tare, ka intensifikuar kontaktet me klubin gjerman. Pasi e kishte vendosur Boniface në listë që në fillim të merkatos, Tare në korrik u fokusua edhe në alternativa të tjera, por tashmë është rikthyer me vendosmëri te sulmuesi nigerian. Përfaqësuesit e Milanit kanë dorëzuar një ofertë zyrtare për huazimin e lojtarit me të drejtë blerjeje, duke tentuar të ulin koston totale të operacionit dhe të përfitojnë nga situata e tij aktuale në Leverkusen.
Nga mediat gjermane raportohet se Bayer Leverkusen është duke vlerësuar këtë propozim. Megjithëse klubi nuk dëshiron të humbasë një lojtar të rëndësishëm, bisedimet janë hapur dhe ekziston një klimë optimiste për arritjen e një marrëveshjeje. Ndërkohë, edhe vetë Boniface ka shprehur gatishmërinë e tij për të nisur një aventurë të re në Serie A. Lojtari mësohet se ka dhënë miratimin për transferimin dhe ka arritur një akord paraprak me klubin italian, në pritje të vendimit përfundimtar të Leverkusenit.
Ky operacion shihet si një hap i rëndësishëm për Milanin, që kërkon të rikthehet në garë për titullin kampion dhe të ketë një skuadër konkurruese në Champions League. Boniface është një profil i përshtatshëm për stilin e lojës që dëshiron të zbatojë trajneri Massimiliano Allegri, duke ofruar fizik, shpejtësi dhe aftësi për të përfunduar aksionet brenda zonës.
