Federata Italiane ka zyrtarizuar emërimin e Silvio Baldinit si trajner të përkohshëm të Italisë për dy ndeshjet e radhës.
Italia do të rikthehet në fushë më 3 qershor në orën 20:45 ndaj Luksemburgut në Stade de Luxembourg. Më 7 qershor, në të njëjtin orar, do të përballet me Greqinë në stadiumin Pankritio në Kretë.
Baldini, aktualisht trajner i ekipit U21, do të drejtojë skuadrën së bashku me stafin e tij, vetëm për dy ndeshjet e qershorit, deri në zgjedhjen e trajnerit të ri.
Italia ka fituar 8 nga 9 përballjet ndaj Luksemburgut, me një barazim të vetëm në vitin 2014. Ndaj Greqisë, bilanci është 7 fitore, 3 barazime dhe 1 humbje në 11 ndeshje. Ndeshja e fundit mes tyre është luajtur më 12 tetor 2019 dhe ka përfunduar 2-0 për Italinë.
Në shtator, Italia do të nisë Nations League në Grupin 1 të Ligës A kundër Francës, Belgjikës dhe Turqisë.
