Bayern Munich njoftoi se të gjitha biletat për ndeshjet e tyre në shtëpi në “Allianz Arena” për sezonin 2025-26 janë shitur.
Kjo ndodh një muaj para nisjes së kampionatit, që starton më 22 gusht me përballjen ndaj Leipzig në “Allianz Arena”. Klubi njoftoi se që nga inaugurimi i stadiumit para 20 vitesh, çdo ndeshje në shtëpi ka qenë e mbushur në kapacitet të plotë me tifozë.
“Sezonin e kaluar, kishte një kërkesë rekord për bileta për ndeshjet e Bayernit në shtëpi në ‘Allianz Arena’. Megjithatë, interesi është rritur edhe më shumë për sezonin 2025/26 të Bundesligës . Tani, edhe një herë, kërkesa tejkalon ofertën për çdo ndeshje”, shpjegoi klubi bavarez në një deklaratë.
Presidenti i Bordit të Bayern Munich, Jan-Christian Dreesen, komentoi: “Që kur ‘Allianz Arena’ u hap njëzet vjet më parë, stadiumi ynë ka qenë i plotë për të gjitha ndeshjet tona zyrtare, kështu që dëshirojmë t’i falënderojmë të gjithë tifozët tanë. Fakti që entuziazmi mbetet i njëjtë pas kaq shumë kohësh dhe që ne mund të arrijmë përsëri një rekord nënvizon si rëndësinë e Bayernit ashtu edhe rëndësinë e stadiumit tonë unik. Pa ‘Allianz Arena’, Bayern nuk do të ishte klubi që është sot. Dhe ajo që fillon në tribuna shtrihet në ekipin tonë: energjia, përkushtimi dhe uniteti. Ne mezi presim të fillojmë sezonin e ri së bashku”, shtoi drejtori.
